Hulanda estado konstitushonal

• Monarkia konstitushonal i demokrasia parlamentario
• Promé i Segundo Kámara (Eerste en Tweede Kamer)
• Ministerionan

[bw]Monarkia konstitushonal i demokrasia parlamentario

For di 1848 Hulanda ta un monarkia konstitushonal. Konstitushon (Grondwet) ta stipulá ku gobièrnu, lesa e ministernan ta responsabel pa maneho gubernamental, i no e monarka. Lareina ta gosa di un posishon di inmunidat.

Hulanda ta un demokrasia parlamentario. Gobièrnu ta goberná e estado bou di supervishon di parlamentu. Gobièrnu ta konsistí di e Ministernan bou di liderato di e Minister-presidente. Parlamento ta konsistí di un Promé Kámara (Eerste Kamer) i un Segundo Kámara (Tweede Kamer)

[bw]E Segundo i Promé Kámara

E 150 miembronan di e Segundo Kámara ta keda eligí direktamente pa e siudadanonan di Hulanda. En prinsipio tin elekshon kada kuater aña. E tarea mayó di Segundo Kámara ta pa supervisá aktonan di gobièrnu. E Segundo Kámara tin algun poder pa hasi esaki. Un di esunnan mas importante ta e derecho pa amendá, lesa e derecho pa kambia proyekto di lei ku kabinete a proponé. E minister responsabel pa e proyekto di lei proponé por akseptá tal kambio, por trese esaki den votashon den Segundo Kámara òf por rechasá esaki. Den e kaso akí Segundo Kámara por presentá un moshon di deskonfiansa kontra e Minister òf e Kabinete. Finalmente esaki por resultá den retiro di e minister òf e kabinete.

Segundo Kámara por hasi uso tambe di su derecho di inisiativa, lesa e derecho pa proponé proyekto di lei, e derecho di interpelashon lesa e derecho pa eksigí klarifikashon di un minister, e derecho di informashon i e derecho di presupuesto. E derechonan akí ta forma e fundeshi pa e demokrasia parlamentario na Hulanda.

E 75 miembronan di Promé Kámara ta keda elegí indirektamente.

Hulanda tin tres nivel di gobernashon: estado, provinsianan i munisipionan. Elekshon pa Konseho Provinsial (e di dos nivel di gobernashon) i pa munisipionan ta kada kuater aña. Delegadonan di Konseho Provinsial ta skohe e miembronan di Promé Kámara (Eerste Kamer).

Promé Kámara ta un ko-legislador i ta vigilá maneho di gobièrnu. Tur konsepto di lei ku a pasa den Segundo Kámara mester haña aprobashon di Promé Kámara tambe. Promé Kámara por rechasá un proyekto di lei. E no por proponé ni kambia proyekto di lei. Ademas, e miembronan di Promé Kámara tin e mesun derechonan ku e miembronan di Segundo Kámara tin.

[bw]Ministerionan

Hulanda tin 13 ministerio.

• Ministerio di Asuntu General
• Ministerio di Asuntu Eksterno i di Koperashon pa Desaroyo
• Ministerio di Asuntu Interno i Relashon den Reino
• Ministerio di Hustisia
• Ministerio di Edukashon, Kultura i Siensia
• Ministerio di Finansa
• Ministerio di Salubridat, Bienestar Sosial i Deporte
• Ministerio di Defensa
• Ministerio di Asuntu Ekonómiko
• Ministerio di Vivienda, Planifikashon Teritorial i Medio Ambiente
• Ministerio di Asuntu Sosial i Labor
• Ministerio di Transporte, Trabounan Públiko i Maneho di Awa
• Ministerio di Agrikultura, Rekursonan Natural i Peska

Na kabes di kada ministerio tin un minister, ku ta karga responsabilidat polítiko pa e maneho di e ministerio konserní. E ta haña asistensia den su tarea di unu òf tin biaha dos sekretario di estado.

E empleadonan públiko na kada ministerio ta asistí e minister i e sekretario di estado den nan trabou. Nan ta mantené un posishon no partidista (prinsipio di loyalidat). Despues di elekshon, e empleadonan públiko ta mantené nan trabou na e mesun ministerio pa e minister o sekretario di estado eligí resientemente.