Sentro di Servisio Regional

• Huntu nos ta konstruí futuro di Boneiru, Sint Eustatius i Saba
• Riba kiko ta trahando kaba?
• Pregunta òf opservashon? 

10-10-10 ta dilanti di porta. Dia 10 di òktober 2010 ta desmantelá Antia Hulandes. Boneiru, Sint Eustatius i Saba ta bira munisipio ‘spesial’ di Hulanda. Kiko e kambionan estatal akí ta nifiká pa Boneiru, Sint Eustatius i Saba? I ki papel ‘Regionaal Service Centrum’ ta hunga den esaki?

Sentro di Servisio Regional (Regionaal Service Centrum)

E proseso di renobashon estatal ta pidi di Hulanda e preparashon nesesario. Pa guia e proseso, gobièrnu di Hulanda a nombra Henk Kamp Komisario pa Boneiru, Sint Eustatius i Saba.

Huntu ku e gobièrnunan lokal i e organisashonnan lokal na e islanan tin ademas un ekipo di ministerionan hulandes, hende ku eksperensia trahando riba lei i proyekto pa e tres islanan. Ta trata akí di spesialista riba diferente tereno di maneho, asina yamá ‘kwartiermakers’ o sea preparadó di kaminda. Nan ta apuntá temporalmente pa huntu ku e islanan prepará pa e renobashonnan estatal kuminsá kana i implementá mehoransa. Ora nan kaba ku nan trabou, nan ta bai bèk Hulanda. Pa ehekushon di e tareanan pa kua Hulanda ta karga responsabilidat, ta reklutá personal tantu posibel na e islanan mes.  

Hulanda ta aspirá pa na Boneiru, Sint Eustatius i Saba tin un gobièrnu di Reino ku ta transparente, efisiente i ku ta traha bon ku otro. Pa logra esaki a lanta na kada isla un Regionaal Service Centrum (RSC). E diferente ministerionan ta kooperá ku otro denter di e Regionaal Service Centrum. E sentro akí lo bira tambe dunadó di trabou di e ámtenarnan di Reino na  Boneiru, Sint Eustatius i Saba.

Regionaal Service Centrum ta ademas e punto di informashon sentral di gobièrnu di Reino. Sivil- i empresanan por bini aki ku tur pregunta tokante loke e proseso estatal ta kontené eksaktamente, kiko e ta nifiká pa nan, kiko ta bai kambia i ki tempu.

[bw]Huntu nos ta konstruí futuro di Boneiru, Sint Eustatius i Saba

Tin kambio grandi ta warda habitantenan di Antia Hulandes. Den vários referèndem na 2004 habitantenan a skohe pa un futuro pafó di e pais Antia Hulandes. Kòrsou i Sint Maarten ta bira pais outónomo denter di Reino Hulandes. Boneiru, Sint Eustatius i Saba ta haña un laso direkto ku Hulanda; nan ta bira entidat públiko di Hulanda. Asina ei Hulanda ta tuma e lugá ku Antia Hulandes a okupá.  

Hulanda ke pa e kambio akí kondusí na mehoransa pa pueblonan di Boneiru, Sint Eustatius i Saba. A palabrá tambe kua ta e tareanan ku Hulanda ta bai kumpli kuné; e tareanan di Antia Hulandes (polis brantwer i belasting por ehèmpel), ademas tareanan riba tereno di benefisio sosial (AOV, ònderstant, pèrdida di entrada na sueldo), salú públiko, kuido di hubentut i enseñansa. Tur esaki den kooperashon ku gobièrnunan di e islanan di Boneiru, Sint Eustatius i Saba.

Na prinsipio di novèmber 2009 a palabrá ku Sint Eustatius i Saba kon e repartishon di tarea entre Hulanda i e islanan ta bai resultá; ken ta hasi kiko despues di 10.10.10.

Pa loke ta trata Boneiru no a disidí riba esaki ainda. Den e skema di tempu aki bou tin marká diferente momento den e proseso.   

[bw]Riba kiko ta trahando kaba?

Antisipando e struktura estatal nobo ku fecha di 10.10.10, tin hopi aktividat den preparashon pa Boneiru, Saba i Sint Eustatius. Aki ta sigui un selekshon di e trayektonan na e tres islanan:

Selekshon di e trayektonan na e tres islanan

Mehoransa den Enseñansa

• Programa di superashon pa siña idioma i siña konta, métodonan nobo di lès, buki di skol gratuito
• Kurso di rekapasitashon pa dosente, gerente di skol, i direktiva  di skol
• Drechamentu di edifisionan di skol  

Hubentut i Famia

• Asesoramentu i informashon bou di e mesdak: Sentro pa Hubentut i Famia
• Mas sosten pa famia i mucha
• Konstrukshon di un Sentro pa Hubentut i Famia
• Mas personal i mas fasilidat  
• Training pa hende ku ta traha ku hóbennan

Salú públiko

• Struktura di seguro kontra gastu di enfermedat  
• Ekspanshon di previshon den sektor di kuido
• Ekspanshon di oportunidat pa hasi deporte i mas aktividat

Seguridat

• Struktura di un kuerpo nobo di polis i di brantwer
• Sentral di keho kaminda semper tin hende pa atendé públiko
• Servisio intensivo di asistensia di emergensia
• Dòbel kantidat di reshèrshi 
• Konstrukshon nobo/renobashon di warda di polis i kuartel di brantwer   
• Renobashon/konstrukshon di kas di detenshon i prison

Infrastruktura

• Drecha aeropuerto- i hafnan

Konstrukshon di Bibienda

     •   Ta laga korporashonnan di bibienda for di Hulanda invertí den kas di hür pa hende ku entrada abou (konstrukshon nobo i renobashon)  

Espasio i Ambiente

• Perkurá pa un bon sistema di awa di bebe
• Perkurá pa un bon ssitema di desagwe di awa shushi i di material residual
• Perkurá pa un bon sistema di ordenamentu urbano

Finansa

• Traha struktura pa fondo di penshun  
• Introdusí dòler entrante 1e di yanüari 2011
• Introdusí legislashon di belasting nobo i reorganisá servisio di belasting
• Regla benefisio sosial pa medio di lei, adaptashon i indeksashon
• Sanea sobrá debenan

[bw]Pregunta òf opservashon?  

Si bo tin pregunta òf opservashon tokante Regionaal Service Centrum òf tokante e struktura estatal den proseso, fabor tuma kontakto ku nos. Ta nos plaser sirbi bo!

Sentro di Servisio Regional Boneiru
Kaya International z/n
Postbus 357
Kralendijk
Boneiru, Nederlandse Antillen

Tel: 00599 717 8333
Fax: 00599 717 8330
Email: info-rsc@rsc-bes.nl

Sentro di Servisio Regional Sint Eustatius
Mazinga Complex A, B
Fort Oranjestraat
Oranjestad
Sint Eustatius, Nederlandse Antillen

Tel: 00599 318 3370
Email: info-rsc@rsc-bes.nl

Sentro di Servisio Regional Saba

The Bottom
Saba, Nederlandse Antillen

Tel: 00599 416 3934
Email: info-rsc@rsc-bes.nl